نکاح کے لیے عمر کی تحدید کا مسئلہ

: تمہید
دنیا کے بیشتر مھذب ممالک میں لڑکا اور لڑکی دونوں کے نکاح کی عمر کم و بیش18 سال مقرر ہے۔ اسی تناظر میں بہت سے مسلم ممالک بشمول پاکستان میں بھی نکاح کے لیے عمر کی تحدید کی گئی ہے۔ پاکستان کے عائلی قانون میں نکاح کے لیے لڑکے کی کم سے کم عمر 18 سال اور لڑکی کےلیے 16 سال مقرر ہے۔ پارلیمنٹ میں پیش کردہ ایک جدید بِل میں لڑکی کے لیے بھی نکاح کی کم سے کم عمر 18 سال کرنے کی سفارش کی گئی ہے۔
اہل علم کے روایتی طبقات نکاح کی عمر کی اس تحدید پر معترض ہیں۔
: ١ .معترضین كا موقف
: اس بل کی مخالفت کی بنیاد ہمارے نزدیک درج ذیل تین نکات پر ہے
i. قرآن مجید سے نابالغ بچی سے نکاح بلکہ اس کی عدت کا حکم بھی ثابت ہے۔
ii. رسول اللہ ﷺ اور آپ کے صحابہ سے کثیر روایات میں کم سن بچوں کا نکاح کرانا مروی ہے۔ جو امر آپؐ کے لیے اور آپ کے سامنے جائز تھا اسے اب ناجائز قرار دینا درست نہیں۔
iii. شریعت نکاح کے لیے عمر کی تحدید نہیں کرتی، اس لیے کسی اتھارٹی کو یہ حق حاصل نہیں کہ وہ اس کی تحدید کرے۔
جمہور فقھا کاموقف ہے کہ نکاح کےلیے بلوغت کی شرط نہیں ہے چہ جائے کہ بلوغت کے بعد نکاح کے لیے عمر کی تحدید کی جائے۔ ان کے مطابق نابالغ بچے یا بچی کاولی، باپ، دادا، بلکہ اس کے عصبہ (مرد رشتہ دار جن سے خونی رشتہ ہو)اس کانکاح کرنے کا اختیار رکھتے ہیں۔ باپ اوردادد کی ولایت میں نابالغ بچی کا نکاح اگر غیر کفو میں کیا گیا ہو یا ولی کی بد نیتی ثابت ہو جائے تو عدالت اسے کالعدم قرار دے سکتی ہے، لیکن لڑکی کو بلوغت بعد خود اپنا نکاح منسوخ کرنے کا اختیار نہیں ہے، سوائے یہ کہ وہ خلع کا تقاضا کرے۔ تاہم ولی اگر باپ اور دادا کے علاوہ دیگر عصبہ ہوں تو لڑکی بلوغت کے بعد اپنا نکاح منسوخ کرنے کا اختیار رکھتی ہے۔
فقھا اس کے بھی قائل ہیں کہ نابالغ بچی سےنکاح کے بعد ازدواجی تعلق بھی قائم کیا جا سکتا ہے۔ اس پر دلیل وہ سور ہ طلاق کی آیت 4 سے پیش کرتے ہیں جس میں ان کے فہم کے مطابق یہ بیان ہوا ہے کہ نابالغ بچیاں جنھیں حیض نہ آیا ہو ان کی عدت تین ما ہ ہے۔ اس سے ثابت ہوتا ہے کہ نہ صرف نابالغ سے نکاح کرنا جائز ہے بلکہ ازدواجی تعلق قائم کرنا بھی روا ہے کیوں کہ یہ معلوم ہے کہ عدت تبھی عائد ہوتی ہے جب ازدواجی تعلق قائم کر لیا گیا ہو۔ تاہم، اس کے ساتھ وہ یہ قید بھی لگاتے ہیں کہ بچی کی جسمانی صحت اتنی ہونی چاہیے کہ ازدواجی عمل کا تحمل کر سکے۔
2. کم عمری کے نکاح کے خلاف چند قدما کا موقف:
قدما میں سے معدودے چند فقھا نابالغی کے نکاح کو درست نہیں سمجھتے ،مثلاً قاضی عبداللہ ابن شبرمہ اور ابو بکر الاصم۔ ان کے مطابق، نکاح کے لیے بلوغت کی ضرورت ہے جس کی تائید قرآن مجید کی درج ذیل آیت سے ہوتی ہے:
{وَابْتَلُوا الْيَتَامَى حَتَّى إِذَا بَلَغُوا النِّكَاحَ} [النساء: 6]
اور نکاح کی عمر کو پہنچنے تک اِن یتیموں کو جانچتے رہو
ان کے مطابق، ولی کی ولایت نابالغ بچوں کے لیے ان امور میں ہوتی ہے جہاں انھیں کوئی حقیقی ضرورت لاحق ہو، جیسے لین دین کے معاملات۔ نابالغ کو چونکہ نکاح کی کوئی حقیقی حاجت نہیں ہوتی، اس لیے یہاں ولایت کی ضرورت نہیں، اس لیے متحقق بھی نہیں۔ نکاح سے جنسی تسکین اور اولاد کی تحصیل مقصود ہوتی ہے اور نابالغ کے معاملے میں یہ دونوں مقاصد حاصل نہیں ہو سکتے۔ پھر یہ کہ اس عقد نکاح کے احکام کا اطلاق بلوغ کی عمر کے بعد ہوتا ہے جب ولی کی ولایت نہیں رہتی۔ بالغ پر اس عقد کی پابندی لاگو نہیں کی جا سکتی ہے جس کو لاگو کرنے والے ولی کی ولایت ہی بعد از بلوغت باقی نہیں رہی۔
اسلامی نظریاتی کونسل پاکستان نے البتہ نے جمہورکے فقہی موقف پر برقرار رہتے ہوئے یہ قرار دیا ہے کہ اس مسئلے پر کسی قانون سازی کی بجائے عوام میں آگاہی پیدا کرنے کی ضرورت ہے کہ کم عمری کی شادی منفی نتائج پیدا کرتی ہے۔
3. کم عمری کے نکاح و شادی پر ہمارا موقف:
ہمارا موقف ہے یہ ہے کہ قرآن مجید کے جن بیانات سے نابالغی کے نکاح کا جواز سمجھا گیا ہے ہمارے نزدیک قرآن کے الفاظ کی دلالتوں سے وہاں ایساثابت نہیں ہوتا ۔
ایک مسلم حکومت کو سماجی مصالح کی کو مد نظر رکھتے ہوئےنکاح کی عمر کی تحدید کے لیےقانون سازی کا اختیار حاصل ہے۔ قرآن مجید اس معاملے میں ایک متوازن طرزِ عمل کی طرف ہماری رہنمائی کرتا ہے۔ وہ نہ صرف بلوغت بلکہ اس سے آگے بڑھ کر نکاح کےلیے مطلوبہ “صلاحیت” ( سنجیدگی) اور رشد (سمجھ داری) جیسی دو بنیادی خصوصیات کو میعار نکاح کے طور پر ذکر کرتا ہے۔
رسول اللہ ﷺاور صحابہ رضی اللہ عنھم کے وقت ولی کی اجازت سےنابالغ بچوں کےنکاح کا تعلق زمانی رسم و رواج سے تھا جسے عرف میں قبولیت حاصل تھی۔ ان روایات سے نابالغی کے نکاح کے شرعی جواز پر استدلال کرنا درست نہیں۔ نیز کسی روایت میں نابالغ بچی کے ساتھ ازدواجی تعلق قائم کرنے کا بھی کوئی ثبوت نہیں ہے۔
حکومت نہ صرف ان امور میں قانون سازی کر سکتی ہےجن میں شریعت خاموش ہے، بلکہ شرعی احکام کی تنفیذ اور اطلاقات میں بھی حالات اور مصالح کی رعایت ملحوظ رکھتے ہوئے اسے قانون سازی کا اختیار حاصل ہے۔ بلوغت کے بعد نکاح کی عمر کی تحدید میں شریعت خاموش ہے۔ چنانچہ اس نابالغی کے معاملے میں حکومت قانون سازی کر سکتی ہے۔ قرآن مجید کے بیانات جو نکاح کے لیے “صلاحیت” اور “رشد” کو قبل از نکاح، نکاح کی ضروری خصوصیات کے طورپر مذکور کرتے ہیں، اس معاملے میں قانون سازی کے لیے رہنمائی کرتے ہیں۔ ذیل میں ہم اپنے اس موقف کی تفصیل دلائل کے ساتھ پیش کرتے ہیں۔
4. قرآن مجید سے نابالغی کے نکاح کے جواز کے استدلالات کا جائزہ:
4.1. سورہ طلاق آیت 4
ہمارے نزدیک قرآن مجید میں نابالغ کے نکاح کا کوئی بیان یا جواز نہیں پایا جاتا۔ جن آیات سے نابالغی کے نکاح کا جواز سمجھا گیا ہے ہم ان کا تجزیاتی جائزہ یہاں پیش کرتے ہیں۔
{وَاللَّائِي يَئِسْنَ مِنَ الْمَحِيضِ مِنْ نِسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْن} [الطلاق: 4]
تمھاری عورتوں میں سے جو حیض سے مایوس ہو چکی ہوں، اور وہ بھی جنھیں حیض نہیں آیا، اُن کے بارے میں اگر کوئی شک ہے تو اُن کی عدت تین مہینے ہو گی۔
ہمارے فقھا اور مفسرین نے” وَاللَّائِي لَمْ يَحِضْن ” سے وہ نابالغ بچیاں مراد لی ہیں جن کو حیض نہیں آیا۔ تدبر کی نگاہ سے دیکھیے تو یہاں “لم’ آیاہے جو نفی جحد کے لیے آتا ہے۔اس کا مفہوم صرف یہ نہیں کہ انھیں حیض نہیں آیا بلکہ یہ ہے کہ بلوغت کی عمر کو پہنچ کر بھی نہ آیا ہو ۔ یہ اسلوب نابالغ بچیوں کے لیے استعمال نہیں کیا جا سکتا۔ اگر حیض نہ آنے کا بیان نابالغ بچیوں کے آتا تو یہ کہا جاتا کہ و ہ (کم سن بچیاں) جنھیں حیض “نہیں آتا”۔ یہاں کہا گیا ہے کہ وہ جنھیں حیض “نہیں آیا”۔ یہ اسلوب تبھی اختیار کیا جاتا ہے جب حیض آنےکا امکان ہونے کے باوجود حیض نہ آیا ہو۔ چناں چہ یہاں نابالغ بچیاں مراد نہیں ہو سکتیں۔
دوسرے یہ کہ لفظ “النساء” جب مطلقاً آئے تو اس کا مصداق بالغ خواتین ہوتی ہیں۔ البتہ قرینہ ہو تو اس سے کم سن بچیاں مراد ہو سکتی ہیں۔ مثلاً قرآن مجید میں ہے:
{وَإِذْ نَجَّيْنَاكُمْ مِنْ آلِ فِرْعَوْنَ يَسُومُونَكُمْ سُوءَ الْعَذَابِ يُذَبِّحُونَ أَبْنَاءَكُمْ وَيَسْتَحْيُونَ نِسَاءَكُمْ وَفِي ذَلِكُمْ بَلَاءٌ مِنْ رَبِّكُمْ عَظِيمٌ} [البقرة: 49]
اور یاد کرو، جب ہم نے تم کو فرعون کے لوگوسے چھڑایا۔ وہ تمھیں برے عذاب چکھاتے تھے، تمھارے بیٹوں کو ڈھونڈ ڈھونڈ کر ذبح کر دیتے تھے اور تمھاری عورتیں جیتی رکھتے تھے اور (تمھیں) اِس (عذاب سے چھڑانے) میں تمھارے پروردگار کی طرف سے (تمھارے لیے) بڑی عنایت تھی۔
چوں کہ یہاں “نساء”، “ابناء”کے مقابل آیا ہے اس لیے یہاں بنی اسرائیل کی وہ کم سن بچیاں مراد ہیں جن کو فرعون کے اہل کار ان کے کم سن بیٹوں کے برعکس قتل نہیں کرتے تھے۔ لیکن سورہ طلاق کی مذکورہ بالاآیت میں ایسا کوئی قرینہ نہیں ہے جس سے کم سن بچیاں مراد لی جا سکیں، بلکہ قرائن اس کے برعکس بالغ خواتین کو متعین کرتے ہیں۔ وہ یوں کہ یہاں عدت کا بیان ہو رہا ہے اور عدت امکان حمل کی صورت حال کے واضح ہونے کے لیےمشروع کی گئی ہے۔ یہی وجہ ہے کہ مطلقہ غیر مدخولہ اور وضع حمل کے بعد خاتون پر عدت نہیں ہے ۔ مزید یہ کہ الفاظ “ان ارتبتم” “اگر تمھیں شک ہو” سے صاف معلوم ہو رہا ہے کہ عدت اسی صورت میں ہے جب آئسہ یا غیر حائضہ ہونے کے باوجود حمل ٹھرجانے کے بارے میں شک ہو،۔حمل کے امکان کے لیے خاتون میں حاملہ ہونے کی صلاحیت کا پایا ضروری ہےاور بلوغت کی عمر سے پہلے یہ ممکن نہیں۔
تفسیری روایات میں”ان ارتبتم” کا ایک دوسرا مفہوم یہ بیان کیا گیا ہے کہ اگر آئسہ یا غیر حائضہ ہونے کے باوجود انھیں خون آئے اور تمھیں شک ہو کہ یہ حیض ہے یا استحاضہ تو اس صورت میں عدت تین ماہ ہے۔ یہ مفہوم ہمارے نزدیک درست نہیں کیوں کہ اس صورت میں عورت کو آئسہ اور غیر حائضہ نہیں کہا جا سکتا ۔ تاہم، اس راےسے بھی یہ بہرحال طے ہو جاتا ہے کہ خاتون کی عمر کم از کم اتنی ہونی چاہیے کہ حیض یا استحاضہ کا شک پیدا ہو سکے اور یہ بلوغت کی عمر سے پہلے ممکن نہیں۔ اس صورت میں بھی لم یحضن سے نابالغ بچیاں مراد نہیں لی جا سکتیں۔ چناں چہ اس آیت میں کم سن بچیوں کی عدت قطعی طور پربیان نہیں ہوئی ہے۔
4.2. سورہ النساء آیت 3:
قرآن مجید کے ایک بیان سے یہ سمجھا گیا ہے کہ نابالغ یتیم بچیوں کے ساتھ نکاح جائز ہے، اور اسی بنا پر علی الاطلاق نابالغہ کا نکاح جائز ہے۔ آیت ملاحظہ ہو:
{وَإِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا} [النساء: 3]
اور اگر اندیشہ ہو کہ یتیموں کے معاملے میں انصاف نہ کر سکو گے تو ان کے ساتھ جو عورتیں ہیں، ان میں سے جو تمھارے لیے موزوں ہوں، اُن میں سے دودو، تین تین، چار چار سے نکاح کرلو۔ پھر اگر ڈر ہو کہ (اُن کے درمیان) انصاف نہ کر سکو گے تو (اِس طرح کی صورت حال میں بھی) ایک ہی بیوی رکھو یا پھر لونڈیاں جو تمھارے قبضے میں ہوں۔ یہ اِس کے زیادہ قریب ہے کہ تم بے انصافی سے بچے رہو۔
یتیم کا لفظ اس نابالغ کے لیے بولا جاتا ہے جس کا والد فوت ہو گیا ہو۔ مفسرین اور فقھا نے یہاں یتامی سے نابالغ یتیم بچیاں مراد لی ہیں جن سے نکاح کی ترغیب دی گئی ہے۔ ہمارے نزدیک یہ مفہوم درست نہیں۔ یتامی کا لفظ نابالغ بچوں اور بچیوں دونوں کے لیے بولا جاتا ہے۔ آیت زیر بحث بچے اور بچی دونوں قسم کے یتیموں کے مسئلے کا حل بیان کررہی ہے۔ چناں چہ یہاں یتامی سے صرف نابالغ یتیم بچیاں مراد نہیں لی جا سکتیں۔ چناں چہ “النساء” میں ال عھد کا مانا جائے گا اور ان خواتین سے مراد یتیموں کی رشتہ دار مائیں بہنیں وغیرہ ہیں جوقابل نکاح ہوں ۔ اس آیت میں ان کو نکاح میں لانے کی اجازت اور ترغیب دے کر ان کے زیر کفالت یتیم بچوں کی مناسب پرورش کے لیےسہولت اور محرک پیدا کیا گیا ہے۔
4.3. سورہ النساء آیت 127
{وَيَسْتَفْتُونَكَ فِي النِّسَاءِ قُلِ اللَّهُ يُفْتِيكُمْ فِيهِنَّ وَمَا يُتْلَى عَلَيْكُمْ فِي الْكِتَابِ فِي يَتَامَى النِّسَاءِ اللَّاتِي لَا تُؤْتُونَهُنَّ مَا كُتِبَ لَهُنَّ وَتَرْغَبُونَ أَنْ تَنْكِحُوهُنَّ وَالْمُسْتَضْعَفِينَ مِنَ الْوِلْدَانِ وَأَنْ تَقُومُوا لِلْيَتَامَى بِالْقِسْطِ وَمَا تَفْعَلُوا مِنْ خَيْرٍ فَإِنَّ اللَّهَ كَانَ بِهِ عَلِيمًا } [النساء: 127]
وہ تم سے عورتوں کے بارے میں فتویٰ پوچھتےہیں۔ اُن سے کہہ دو کہ اللہ تمھیں اُن کے بارے میں فتویٰ دیتا ہے اور جن عورتوں کے حقوق تم ادا نہیں کرنا چاہتے، مگر اُن سے نکاح کرنا چاہتے ہو، اُن کے یتیموں سے متعلق جو ہدایات اِس کتاب میں تمھیں دی جارہی ہیں، اُن کے بارے میں اور (دوسرے) بے سہارا بچوں کے بارے میں بھی فتویٰ دیتا ہے کہ عورتوں کے حقوق ہر حال میں ادا کرو اور یتیموں کے ساتھ ہر حال میں انصاف پر قائم رہو اور (یاد رکھو کہ اِس کے علاوہ بھی) جو بھلائی تم کرو گے، اُس کا صلہ لازماً پاؤ گے، اِس لیے کہ وہ اللہ کے علم میں رہے گی۔
سورہ نساء کی یہ آیت سورہ نساء کی مذکورہ بالا آیت 3 کی توضیحی آیت ہے۔ عام طور پر مفسرین نے یہاں بھی یتامی النساء سے یتیم بچیاں مراد لی ہیں۔ اور مفہوم یہ بیان کیا ہے کہ وہ یتیم بچیاں جن سے ان کے مال اور جمال کی وجہ سے ان کے ذمہ داران نکاح تو کرنا چاہتے تھے مگر ان کو پوراحق مہر نہیں دینا چاہتے تھے، انھیں یہ کہا گیا ہے کہ ان کے ساتھ عدل کا معاملہ کرتے ہوئے پورا حق مہر دے کر ان کے ساتھ نکاح کرو۔ اس کی تائید میں یہ روایت پیش کی جاتی ہے:
عُرْوَةُ، أَنَّهُ سَأَلَ عَائِشَةَ رَضِيَ اللَّهُ عَنْهَا، وَقَالَ اللَّيْثُ: حَدَّثَنِي يُونُسُ، عَنْ ابْنِ شِهَابٍ، قَالَ: أَخْبَرَنِي عُرْوَةُ بْنُ الزُّبَيْرِ، أَنَّهُ سَأَلَ عَائِشَةَ رَضِيَ اللَّهُ عَنْهَا، عَنْ قَوْلِ اللَّهِ تَعَالَى: {وَإِنْ خِفْتُمْ أَلَّا تُقْسِطُوا} [النساء: 3] إِلَى {وَرُبَاعَ} [النساء: 3]، فَقَالَتْ: «يَا ابْنَ أُخْتِي هِيَ اليَتِيمَةُ تَكُونُ فِي حَجْرِ وَلِيِّهَا تُشَارِكُهُ فِي مَالِهِ، فَيُعْجِبُهُ مَالُهَا وَجَمَالُهَا، فَيُرِيدُ وَلِيُّهَا أَنْ يَتَزَوَّجَهَا، بِغَيْرِ أَنْ يُقْسِطَ فِي صَدَاقِهَا، فَيُعْطِيهَا مِثْلَ مَا يُعْطِيهَا غَيْرُهُ، فَنُهُوا أَنْ يُنْكِحُوهُنَّ [ص:140] إِلَّا أَنْ يُقْسِطُوا لَهُنَّ، وَيَبْلُغُوا بِهِنَّ أَعْلَى سُنَّتِهِنَّ مِنَ الصَّدَاقِ، وَأُمِرُوا أَنْ يَنْكِحُوا مَا طَابَ لَهُمْ مِنَ النِّسَاءِ سِوَاهُنَّ» قَالَ عُرْوَةُ: قَالَتْ عَائِشَةُ: ثُمَّ إِنَّ النَّاسَ اسْتَفْتَوْا رَسُولَ اللَّهِ صَلَّى اللهُ عَلَيْهِ وَسَلَّمَ بَعْدَ هَذِهِ الآيَةِ، فَأَنْزَلَ اللَّهُ: ” {وَيَسْتَفْتُونَكَ فِي النِّسَاءِ} [النساء: 127] إِلَى قَوْلِهِ {وَتَرْغَبُونَ أَنْ تَنْكِحُوهُنَّ} [النساء: 127] ” وَالَّذِي ذَكَرَ اللَّهُ أَنَّهُ يُتْلَى عَلَيْكُمْ فِي الكِتَابِ الآيَةُ الأُولَى، الَّتِي قَالَ فِيهَا: {وَإِنْ خِفْتُمْ أَلَّا تُقْسِطُوا فِي اليَتَامَى، فَانْكِحُوا مَا طَابَ لَكُمْ مِنَ النِّسَاءِ} [النساء: 3]، قَالَتْ عَائِشَةُ: وَقَوْلُ اللَّهِ فِي الآيَةِ الأُخْرَى: {وَتَرْغَبُونَ أَنْ تَنْكِحُوهُنَّ} [النساء: 127] يَعْنِي هِيَ رَغْبَةُ أَحَدِكُمْ لِيَتِيمَتِهِ الَّتِي تَكُونُ فِي حَجْرِهِ، حِينَ تَكُونُ قَلِيلَةَ المَالِ وَالجَمَالِ، فَنُهُوا أَنْ يَنْكِحُوا مَا رَغِبُوا فِي مَالِهَا وَجَمَالِهَا مِنْ يَتَامَى النِّسَاءِ إِلَّا بِالقِسْطِ، مِنْ أَجْلِ رَغْبَتِهِمْ عَنْهُن صحيح البخاري (2494)
عروہ بن زبیر نے خبر دی کہ انہوں نے عائشہ رضی اللہ عنہا سے ( سورۃ نساء آیت3 کے بارے) میں پوچھا ” اگر تم کو یتیموں میں انصاف نہ کرنے کا ڈر ہو تو جو عورتیں پسند آئیں دو دو تین تین چار چار نکاح میں لاؤ “ انہوں نے کہا میرے بھانجے یہ آیت اس یتیم لڑکی کے بارے میں ہے جو اپنے ولی ( محافظ رشتہ دار جیسے چچیرا بھائی ، پھوپھی زاد یا ماموں زاد بھائی ) کی پرورش میں ہو اور ترکے کے مال میں اس کی ساجھی ہو اور وہ اس کی مال داری اور خوبصورتی پر فریفتہ ہو کر اس سے نکاح کر لینا چاہے لیکن پورا مہر انصاف سے، جتنا اس کو اور جگہ ملتا، وہ نہ دے ، تو اسے اس سے منع کر دیا گیا کہ ایسی یتیم لڑکیوں سے نکاح کرے ۔ البتہ اگر ان کے ساتھ ان کے ولی انصاف کر سکیں اور ان کی حسب حیثیت بہتر سے بہتر طرز عمل مہر کے بارے میں اختیار کریں ( تو اس صورت میں نکاح کرنے کی اجازت ہے ) اور ان سے یہ بھی کہہ دیا گیا کہ ان کے سوا جو بھی عورت انہیں پسند ہو ان سے وہ نکاح کر سکتے ہیں ۔ عروہ بن زبیر نے کہا کہ عائشہ رضی اللہ عنہا نے بتلایا ، پھر لوگوں نے اس آیت کے نازل ہونے کے بعد ( ایسی لڑکیوں سے نکاح کی اجازت کے بارے میں ) مسئلہ پوچھا تو اللہ تعالیٰ نے یہ آیت نازل کی ” اور آپ سے عورتوں کے بارے میں یہ لوگ سوال کرتے ہیں “ ۔ آگے فرمایا اور تم ان سے نکاح کرنا چاہتے ہو ۔ یہ جو اس آیت میں ہے اور جو قرآن میں تم پر پڑھا جاتا ہے اس سے مراد پہلی آیت ہے یعنی ” اگر تم کو یتیموں میں انصاف نہ ہوسکنے کا ڈر ہو تو دوسری عورتیں جو بھلی لگیں ان سے نکاح کر لو “ ۔ حضرت عائشہ رضی اللہ عنہا نے کہا یہ جو اللہ نے دوسری آیت میں فرمایا اور تم ان سے نکاح کرنا چاہتے ہو اس سے یہ غرض ہے کہ جو یتیم لڑکی تمہاری پرورش میں ہو اور مال اور جمال کم رکھتی ہو اس سے تو تم نفرت کرتے ہو ، اس لیے جس یتیم لڑکی کے مال اور جمال میں تم کو رغبت ہو اس سے بھی نکاح نہ کرو مگر اس صورت میں جب انصاف کے ساتھ ان کا پورا مہر ادا کرو ۔
ہمارے نزدیک اس آیت میں بھی یتامی النساء سے مراد عورتوں کے یتیم ہیں اور یہ وہ عورتیں تھیں جن سے ان کے یتیموں کی وجہ سے نکاح کیا جا رہا تھا مگر اس احسان کے بدلے میں یہ سوال پیدا ہوگیا تھا کہ کیا ان کو نان نفقہ بھی دیا جائے گا تو کیا مہر بھی دینا ہوگا اور کیا ان کے حقوق میں انصاف کا خیال بھی رکھناہوگا، جس کا جواب یہ دیا گیا کہ مہر اور عدل دونوں کا لحاظ رکھنا ضروری ہوگا۔ اس کے بعد یتیموں کا حکم الگ سے بیان ہوا کہ ان کے بارے میں ہر حال میں انصاف پر قائم رہنا ضروری ہے۔
یتیموں کی ماؤں بہنوں وغیرہ کا حکم وَأَنْ تَقُومُوا لِلْيَتَامَى بِالْقِسْطِ کے معطوف علیہ میں بیان ہوا ہے جو یہاں حذف کر دیا ہے۔ یہ کلام عرب کا خاص معروف اسلوب ہے کہ بعض اوقات معطوف علیہ اس بنا پر حذف کردیا جاتا ہےکہ فحوائے کلام سے وہ خود متبادر ہوتا ہے۔ یہاں دیکھا جاسکتا ہے کہ وَأَنْ تَقُومُوا لِلْيَتَامَى بِالْقِسْطِ میں واؤ عاطفہ معطوف علیہ کا تقاضا کر رہا ہے جو کلام میں موجود نہیں۔ یہی محذوف ترجمہ میں ظاہر کیا گیا ہے ” کہ عورتوں کے حقوق ہر حال میں ادا کرو”۔
حضرت عائشہ سے مروی درج بالا روایت میں ہمارے نزدیک یتیمہ سے بالغ یتیم بچیاں مراد ہیں۔ عام بول چال کی زبان میں بغیر باپ کے بالغوں کو بھی یتیم کہہ دیا جاتا ہے۔ نابالغ یتیمہ کے نکاح کی تو رسول اللہ ﷺ نے ممانعت فرما دی تھی۔ اس آیت کا ایک اطلاق یہ بھی بنتا ہے جسے حضرت عائشہ نے اس روایت میں بیان کیا۔
چنانچہ اس بناپر یہ کہنا بجا ہوگا کہ نابالغی کے نکاح کے جواز کا الزام قرآن مجید پر نہیں رکھا جا سکتا۔
5. قرآن مجید میں بیان ہونے والے نکاح کے دو معیار:
5.1. صلاحیت
قرآن مجید نکاح کے بنیادی مقاصد کے عین مطابق نہ صرف جسمانی بلوغت بلکہ “صلاحیت” کو نکاح کے معیار کی حیثیت سے ذکر کرتا ہے:
وَاَنْکِحُوا الْاَیَامٰی مِنْکُمْ وَالصّٰلِحِیْنَ مِنْ عِبَادِکُمْ وَاِمَآءِکُمْ ، اِنْ یَّکُوْنُوْا فُقَرَآءَ یُغْنِھِمُ اللّٰہُ مِنْ فَضْلِہٖ ، وَاللّٰہُ وَاسِعٌ عَلِیْمٌ. وَلْیَسْتَعْفِفِ الَّذِیْنَ لَا یَجِدُوْنَ نِکَاحًا حَتّٰی یُغْنِیَھُمُ اللّٰہُ مِنْ فَضْلِہٖ . (النور ۲۴: ۳۲۔۳۳)
’(اِسی طرح یہ بھی ضروری ہے کہ) تم میں سے جو لوگ مجرد ہوں، اُن کے نکاح کر دو اور اپنے اُن غلاموں او رلونڈیوں کے بھی جو اِس کی صلاحیت رکھتے ہوں۔ اگر وہ تنگ دست ہوں گے تو اللہ اُن کو اپنے فضل سے غنی کر دے گا۔ اللہ بڑی وسعت والا ہے، وہ ہر چیز کا علم رکھتا ہے۔ اور جو نکاح کا موقع نہ پائیں، اُنھیں چاہیے کہ اپنے آپ کو ضبط میں رکھیں، یہاں تک کہ اللہ اُن کو اپنے فضل سے غنی کر دے۔ ‘‘
“صلاحیت” ایک جامع لفظ ہے جس میں جسمانی صلاحیت اور ذہنی طور پر درست ہونے کے علاوہ ازدواجی زندگی کی جملہ ذمہ داریوں کو اٹھانے کے لیے فرد میں مطلوبہ سنجیدگی اور احساس ذمہ داری وغیرہ شامل ہے۔ غلاموں لونڈیوں کے لیے صلاحیت کا خاص طور پر تذکرہ اس لیے ضروری ہوا نکاح کا یہ اولین معیار کا ان میں پایا جانا محل نظر تھا۔ بے اختیاری اور عدم تربیت کے جس ماحول میں وہ بڑے ہوتے تھے ان میں ان میں ازدواجی زندگی کے لیے مطلوبہ سنجیدگی اور احساس ذمہ داری کی صلاحیت کا پایا جانا احتمال کے درجے میں تھا۔ جب کہ آزاد لوگوں میں یہ خصوصیات عموماموجود ہوتی ہیں۔ چناں چہ آیت کا یہ مفہوم لینا زبان و بیان کے تقاضوں کے خلاف ہوگا کہ غلاموں اورلونڈیوں کا نکاح تو تب کیا جائے جب ان میں یہ صلاحیت دیکھ لی جائے مگر آزاد کا نکاح اس کے بغیر بھی کر دیا جائے۔ مقصود کلام اس صلاحیت کو دونوں کے لیے ضروری قرار دیتا ہے۔ مگر ہم سمجھ سکتے ہیں نکاح کی ذمہ داریاں سنبھالنے کے لیے مطلوبہ صلاحیت کا پایا جاناعقلی تقاضا تو ہے ہی، غلام لونڈیوں کے نکاح کے لیے بھی اس کا تذکرہ کر کے قرآن مجید نے اسے مؤکد کر دیا ہے۔چناں چہ ہم کہ سکتے ہیں کہ یہاں شریعت نے ہماری رہنمائی کر دی ہے کہ نکاح کے لیے جس صلاحیت کا تقاضا عقل کرتی ہے، شریعت بھی اس کی تائید کرتی ہے۔
5.2. رشد:
یتیموں کے مالی معاملات کے بیان میں اللہ تعالی نے یہ ہدایت دی ہے کہ ان کے مال کے نگران ان کا مال ان کے حوالے تب کریں جب وہ نہ صرف جسمانی طور پربالغ ہو جائیں بلکہ ان میں :رشد” یعنی اتنی سمجھ داری بھی نظر آئے کہ وہ اپنے مالی معاملات سنبھال سکتے ہوں۔ اس کے لیے ان کی سمجھ داری کو جانچا پرکھا جائے:
{وَلَا تُؤْتُوا السُّفَهَاءَ أَمْوَالَكُمُ الَّتِي جَعَلَ اللَّهُ لَكُمْ قِيَامًا وَارْزُقُوهُمْ فِيهَا وَاكْسُوهُمْ وَقُولُوا لَهُمْ قَوْلًا مَعْرُوفًا وَابْتَلُوا الْيَتَامَى حَتَّى إِذَا بَلَغُوا النِّكَاحَ فَإِنْ آنَسْتُمْ مِنْهُمْ رُشْدًا فَادْفَعُوا إِلَيْهِمْ أَمْوَالَهُمْ وَلَا تَأْكُلُوهَا إِسْرَافًا وَبِدَارًا أَنْ يَكْبَرُوا وَمَنْ كَانَ غَنِيًّا فَلْيَسْتَعْفِفْ وَمَنْ كَانَ فَقِيرًا فَلْيَأْكُلْ بِالْمَعْرُوفِ فَإِذَا دَفَعْتُمْ إِلَيْهِمْ أَمْوَالَهُمْ فَأَشْهِدُوا عَلَيْهِمْ وَكَفَى بِاللَّهِ حَسِيبًا} [النساء: 5، 6]
اور( یتیم اگر ابھی نادان اور بے سمجھ ہوں تو) اپنے وہ اموال جن کو اللہ نے تمھارے لیے قیام اور بقا کا ذریعہ بنایا ہے، اِن بے سمجھوں کے حوالے نہ کرو۔ ہاں، اِ ن سے فراغت کے ساتھ اُن کو کھلاؤ، پہناؤ اور اُن سے بھلائی کی بات کرو۔اور نکاح کی عمر کو پہنچنے تک اِن یتیموں کو جانچتے رہو، پھر اگر اُن کے اندر اہلیت پاؤ تو اُن کے مال اُن کے حوالے کر دو، اور اِ س اندیشے سے کہ بڑے ہوجائیں گے، اُن کے مال اڑا کر اور جلد بازی کرکے کھا نہ جاؤ۔ اور (یتیم کا) جو (سرپرست) غنی ہو، اُسے چاہیے کہ (اُس کے مال سے) پرہیز کرے اور جو محتاج ہو، وہ (اپنے حق خدمت کے طور پر) دستور کے مطابق (اُس سے) فائدہ اٹھائے۔ پھر جب اُن کے اموال اُن کے حوالے کرنے لگو تو اُن پر گواہ ٹھیرا لو،ورنہ حساب کے لیے تواللہ کافی ہے۔
اس پر قیاس کرتے ہوئے ہم کہ سکتے ہیں کہ نکاح بھی فریقین کے درمیان ایک معاملہ اور معاہدہ ہے۔ یہ کسی بھی مالی معاملے سے زیادہ نازک اور اہم معاملہ ہے۔ چناں چہ اس معاہدہء نکاح کے لیےفریقین کا نہ صرف جسمانی طور پر بالغ ہونا ضروری ہے بلکہ عقل کے اعتبار سے ان میں وہ سمجھ داری (رشد) بھی ہونی چاہیے جو ازدواجی زندگی کی ذمہ داریوں کے نبھانے کے لیے ضروری ہے ۔ ایسی سمجھ داری کسی نابالغ میں عموماً نہیں پائی جاتی۔ اس لیے نابالغ کا نکاح بھی شریعت کے لیے غیر مطلوب ہے۔
6. قرن اول میں نابالغی کے نکاح کی روایات پر ہمارا موقف:
عرب میں نابالغ بچوں کے نکاح کارواج تھا ۔ یہ اس وقت کے قبائلی سماج کا رواج تھا جسے قبولیت حاصل تھی۔اس بنا پر قرن اوّل میں بھی اس عمل جاری رہا۔شریعت نے اسے علی الاطلاق ممنوع تو قرار نہیں دیا لیکن معیارِ نکاح، جسے پیشتر واضح کیا گیا، واضح طور پر قرآن مجید میں بیان کر کے درست رہنمائی فرما دی ۔
نابالغ کے نکاح کی کوئی ترغیب کہیں نہیں دی گئی، بلکہ ایسے نکاح کے معاملے کو اس وقت کے سماج میں بھی تحفظات کے ساتھ دیکھا جاتا تھا۔ چناں چہ یتیم بچیوں کے معاملے میں رسول اللہ ﷺ نے ان کی بلوغت سے قبل ان کا نکاح کرنا منع فرما دیا تھا اس لیے کہ ان کے ایسے ولی کا امکان موجود نہیں تھا جو ان کے لیے باپ جیسی شفقت رکھتا ہو۔ (بخاری،رقم حدیث، 5138)
اس بحث سے یہ بات واضح ہو جاتی ہے کہ شریعت نے نکاح کے لیے نہ صرف جسمانی بلوغت بلکہ “صلاحیت نکاح” اور” رشد”جیسےجامع لفظ کو بطور معیار بیان کیاہے۔ اس “صلاحیت” اور” رشد” کی ملکی سطح پر تعیین اور تحدیدکے لیےحکومت کو یہ اختیار حاصل ہے کہ سماجی حالات اور مصالح کو مد نظر رکھتے ہوئے قانون سازی کرے۔
7. حکومت کے قانونی سازی کے اختیار کی شرعی حدود:
ہم جانتے ہیں کہ ایک مسلم حکومت کو یہ اختیار حاصل ہے کہ وہ نہ صرف ان معاملات میں قانون سازی کر سکتی ہے جنھیں شریعت نے موضوع نہیں بنایا بلکہ شریعت کے منصوص احکامات کے اطلاق اور نفاذ میں بھی حالات کی رعایت رکھتے ہوئے قانون سازی کر سکتی ہے۔حضرت عمر کے دور خلافت کی متعدد مثالیں اس ضمن میں ہماری رہنمائی کے لیے موجود ہیں۔ مثلاً، عراق کی زمینوں کو مجاہدین میں تقسیم کرنے کی بجائے انھوں نے انھیں قومی ملکیت قرار دیا، عام الرمادہ کے طویل قحط کے دوران میں چوری کی سزا، قطع ید کو معطل کر دیا، طلاق کے معاملے میں جب مسلم سماج میں بے احتیاطی بڑھنے لگی تو آپ نے بیک وقت تین طلاق دینے کو تین ہی نافذ کرنے کا انتظامی حکم جاری کیا۔ اس بنا پر یہ کہنا درست ہوگا کہ چوں کہ شریعت نکاح کی عمر کی تحدیدکے معاملے میں خاموش ہے اس لیے یہ حکومت کا اختیار ہے وہ اس معاملے میں کوئی قانون سماجی مصالح کی روشنی میں بنا دے۔ دوسرے یہ کہ بالفرض اگر نکاح کے لیے عمر کی عد م تحدید کو شریعت کی تائید حاصل بھی ہو تو اس کے باوجود بھی حالات کے تقاضے بدل جانےاور مصالح کی رعایت سے اس بارے میں قانون سازی کرنے کا اختیار حکومت کو حاصل ہے ۔
اس کی مزید تائید اس سے بھی ہوتی ہے کہ یتیم بچیوں کے معاملے میں رسول اللہ ﷺ نے ایسا کر کے دکھا بھی دیا ہے کہ جب ان کے ولیوں میں باپ جیسی شفقت کا امکان نہیں پایا گیا تو ان کے نابالغی کے نکاح کو منع فرمایا۔ اس پر قیاس کرتے ہوئے ہم کہ سکتے ہیں کہ جیسا کہ ہم جانتے ہیں کہ ہمارے سماج میں خواتین سے متعلق سماجی رویے حوصلہ افزا نہیں ہیں۔ کچھ طبقات اور علاقہ جات میں لڑکیوں کونکاح کے نام پر بیچا جاتا ہے، مفلسی کی وجہ سے ان کی جلد شادی کرکے ان کے اخراجات کےبوجھ سے نجات حاصل کرنے کی کوشش کی جاتی ہے، جھگڑے نمٹانے کے لیے ونی کی رسم کی تحت انھیں بطور تاوان دشمن کے حوالے کر دیا جاتا ہے، خاندانوں میں وٹے سٹے کے نام پران کی مرضی کے خلاف بھی ان کا نکاح کر دیا جاتا ہے، بلکہ بعض علاقوں میں (نعوذ باللہ) قرآن مجید سے ان کا نکاح کر دیا جاتا ہے۔ پھر طبی رپورٹوں سے یہ ثابت ہے کہ کم عمری کی شادی سے زچہ اور بچہ کے صحت سخت متاثر ہوتی ہے، نیز کم عمری کی شادی، شادی کے بعد کی ذمہ داریوں کی انجام دہی کےلیے موزوں نہیں۔ ایسے حالات میں حکومت اگر نکاح کی عمر کی کوئی ایسی تحدید کرتی ہے جس سے کم سن بچوں کو استحصال سے بچایا جا سکے تو یہ عین تقاضائے شریعت ہے۔ 18 سال کی عمر متعین ہون نے سے کم از کم اتنا ممکن ہو سکتا ہے کہ اس عمر کی جوان لڑکی یا لڑکا اپنے خلاف زیادتی کا ادراک کرتے ہوئے قانون کا سہارا لے سکے۔
8. خلاصہ
خلاصہ یہ ہے کہ نکاح کی تسلیم شدہ بنیادیہ ہے کہ نکاح سے مقصود مرد اور عورت کے درمیان جنسی تعلق کو جائز حدود مہیا کرنا اور خاندان کے ادارے کی بنیاد رکھنا ہے۔ اس کے لیے نکاح کے فریقین کی شعوری رضامندی ایک بدیہی تقاضا ہے۔ اس رفاقت نتیجے میں ایک دوسرے کی مادی ضروریات کی تکمیل بھی فریقین کے ذمہ عائد ہو جاتی ہے۔ تاہم نکاح میں اگر بنیادی مقصد ہی مفقود ہو تو اسے درست قرار نہیں دیا جا سکتا۔ نابالغ کے ساتھ نکاح میں یہ بنیادی مقاصد اور ان کے لیے ان کی رضامندی دونوں نہیں پائے جاتے۔ بلوغت کی عدم موجودگی میں فریقِ ثانی سے جنسی تعلق کےلیے داعیہ اور تسکین بھی مفقود ہوتے ہیں۔ فریقین میں سے ایک بالغ اور دوسرا نابالغ ہو تو یہ تعلق نابالغ فریق کے حق میں زیادتی اور ریپ (Rape) کا سبب بنتا ہے۔ نابالغ لڑکی کے معاملے میں یہ معاملہ محتاج بیان نہیں۔ یہ زیادتی ہے اور ہر زیادتی شریعت کی نظر میں ناجائز ہے۔ نیز لڑکا اس عمر میں قّوام (نگران، محافط) بننے کی صلاحیت نہیں رکھتا۔
حکومت کو یہ اختیار حاصل ہے کہ وہ نکاح کے لیے عمر کی تحدید کی معاملے میں طبی اور سماجی علوم کے ماہرین کی آرا کی روشنی میں سماجی مصالح کو مد نظر رکھتے ہوئے قانون سازی کرے، ہمارے نزدیک شریعت ایسی صالح قانون سازی کی تائید کرتی ہے۔
واللہ اعلم

اس تحریر كو شیئر كریں
Share on facebook
Share on twitter
Share on linkedin
Share on whatsapp
Share on email
Dr Irfan Shehzad

Dr Irfan Shehzad

Dr Irfan Shehzad belongs to Rawalpindi, Pakistan. He holds a doctorate in Islamic Studies from National University of Modern Languages (NUML) Islamabad, Pakistan. He is working as a companion to Ghamidi Center of Islamic Learning Dallas, USA. He is an assistant research fellow with Al-Mawird Pakistan. He is the author of the book, “Qanoon-e-Itmam-e-Hujjat awr Us kay Itlaqaat: Janab Javed Ahmad Ghamidi ki Tawzihaat par Aetrazaat awr Ishkalaat ka Jaiza”, published by Almawrid Lahore Pakistan. Dr Irfan Shehzad writes and speaks on religious, social and sociopolitical issues. His articles are published in different scholarly journals including Ishraq, Lahore, Pakistan, Al-Shariah Gujranwala Pakistan and on social media.

Leave a Reply

Your email address will not be published. Required fields are marked *